Skólaráð

Við grunnskóla skal starfa skólaráð sem er samráðsvettvangur skólastjóra og skólasamfélags um skólahald.

Skólastjóri hefur forgöngu um stofnun skólaráðs. Hann situr í skólaráði og stýrir starfi þess. Auk skólastjóra sitja í skólaráði tveir fulltrúar foreldra, tveir fulltrúar kennara, einn fulltrúi annars starfsfólks skólans, tveir fulltrúar nemenda og einn fulltrúi grenndarsamfélags eða viðbótarfulltrúi úr hópi foreldra valinn af öðrum fulltrúum skólaráðs. Staðgengill skólastjóra stýrir skólaráði í forföllum skólastjóra.

Kjör fulltrúa almennra starfsmanna og kennara í skólaráði fer fram á starfsmannafundi í byrjun skólaárs annað hvert ár. Fulltrúar eru kosnir til tveggja ára í senn.  Fulltrúar nemenda eru úr hópi nemenda í 9. og 10. bekk. Fulltrúar nemenda sitja í nemendaráði skólans og eru tengiliður skólaráðs við það.  Á öllum fundum skólaráðs er liður sem heitir frá nemendum. Þar segja nemendur frá því sem er efst á baugi hjá þeim og bera upp mál frá nemendum.

Hægt er að senda erindi inn fyrir skólaráð á netfangið skolarad.egilsstadir@mulathing.is

Fundað er þrisvar til fjórum sinnum á skólaárinu. Skólaráð skal að auki halda einn opinn fund á skólaárinu. Skólastjóri setur saman dagskrá og boðar skólaráðsfundi. Einn af skólaráðsmönnum sjá um að rita fundargerðir, sem birtar eru á heimasíðu skólans. 

Starfsáætlun skólaráðs 2024 - 2025

Skólaárið 2024-2025 verða fjórir fundir í skólaráði og þar af einn opinn fundur. Taka þarf ákvörðun um hvaða fundur á að vera opinn. Skólastjóri boðar til fundar með að minnsta kosti viku fyrirvara með dagskrá. Fundargerðir skulu ritaðar og liggja fram í skólanum og á heimasíðu skólans.

Meðal umfjöllunarefnis skólaráðs:

• Fjallar um skólanámskrá, rekstraráætlun, starfsáætlun og aðrar áætlanir um skólastarfið.
• Fjallar um fyrirhugaðar meiriháttar breytingar á skólahaldi og starfsemi skóla og gefur umsögn áður en endanlegar ákvarðanir um þær eru teknar.
• Tekur þátt í að móta stefnu og sérkenni skóla og tengsl hans við grenndarsamfélagið.
• Fylgist með öryggi, húsnæði, aðstöðu, aðbúnaði og almennri velferð nemenda.
• Fjallar um skólareglur og umgengishætti í skólanum.
• Fjallar um erindi frá skólanefnd sveitarfélags, foreldrafélagi, kennarafundi, almennum starfsmannafundi, nemendafélagi, einstaklingum, menntamálaráðuneyti, öðrum aðilum varðandi málefni sem talin eru upp í þessari málsgrein og veitir umsögn sé þess óskað.
• Tekur þátt í öðrum verkefnum á vegum skólanefndar að fengnu samþykki sveitarstjórnar.

Skólaráð fjallar ekki um málefni einstakra nemenda, foreldra eða starfsfólks skóla.

Áætlaðir fundir skólaráðs:

1. Miðvikudagurinn 8. október 2024 kl. 17.00
2. Miðvikudagurinn 27. nóvember 2024 kl. 17.00 - Fundur með nemendaráði
3. Miðvikudagurinn 12. febrúar 2025 kl. 17.00 – Opinn fundur í skólaráði
4. Miðvikudagurinn 14. maí 2025 kl. 17.00