Fréttir

Mánudaginn 9. október koma fræðarar Samtakanna 78 í skólann og hitta nemendur í 3., 6. og 9. bekk. Fræðslan er hluti af samningi sveitarfélagsins við Samtökin 78. Starfsfólk skólans fær fræðslu sama dag og af þeirri ástæðu lokar Frístund klukkan 14.20.

Krakkarnir í 2. bekk eru að vinna ýmis verkefni tengd haustinu. Þau fóru út og söfnuðu laufum sem þau þurrkuðu og límdu svo á blað sem þau skrifuðu texta á. Þau hafa líka skoðað orð sem tengjast haustinu auk þess að æfa sig á samsettum orðum, orðum sem byrja á au- og mörgu öðru.

Náttúruskólinn var formlega stofnaður árið 2022 af hópi náttúru- og útivistarunnenda í Múlaþingi. Hópurinn hefur í mörg ár haldið námskeið á þessu sviði. Hlutverk Náttúruskólans er að efla börn og ungmenni til umhyggju og árvekni gagnvart sjálfum sér og náttúrunni og bjóða upp á áskoranir og skapandi tækifæri til reynslunáms. Í skólanum er lögð áhersla á útivist, átthagafræðslu, heilbrigðan lífsstíl, samskipti og samvinnu. Múlaþing gerði samning við Náttúruskólann um að tveir árgangar sæktu námskeið í skólanum og í liðinni viku fóru nemendur í 3ja bekk inn í Eyjólfsstaðaskóg þar sem ýmislegt var brasað. Skólinn hefur aðstöðu í Blöndalsbúð og rjóðrinu rétt hjá. Krakkarnir lærðu að tálga, búa til klifurgrind, baka lummur og fóru í gönguferðir í skóginum. Það voru einbeitt börn sem lögðu sig fram í verkefnunum og virtust njóta þessarar tilbreytingar frá hefðbundnu skólastarfi. Í október mun 9. bekkur fara í Óbyggðasetrið á vegum Náttúruskólans. Sagt verður frá því þegar þar að kemur.

Í dag er fyrsti kynningarfundur haustsins fyrir foreldra og forráðamenn í 1. - 4. bekk. Dagskráin hefst með fræðslu um "Uppeldi til ábyrgðar" sem fer fram í matsal. Á eftir taka umsjónarkennarar árganga á móti fólki í heimastofum og ræða um vetrarstarfið. Hvetjum foreldra og forráðamenn til að mæta á þessa kynningarfundi.

Þorgrímur Þráinsson rithöfundur kom í árlega heimsókn sína í 10. bekk í morgun. Þorgrímur býðst til að koma í alla skóla og spjalla við krakkana um það að bera ábyrgð á sjálfum sér, sýna samkennd og þrautseigju, koma fallega fram og gera góðverk. Hann hefur lagt áherslu á að kynna markmiðssetningu og að sinna litlu hlutunum daglega. Þorgrími hefur ávallt verið vel tekið af krökkunum og í dag var engin undantekning á.

Í Egilsstaðaskóla er hefð fyrir göngudegi í byrjun september. Árgangarnir fara vítt og breitt um Fljótsdalshérað í lengri og styttri göngur, ásamt öllu starfsfólki skólans. Meðfylgjandi eru myndir úr göngu 7. bekkjar í Valtýshelli, 9. bekkjar í Stapavík og 10. bekkjar í Stórurð.

Árlegur göngudagur Egilsstaðaskóla er í dag. Krakkarnir voru hressir í bragði þegar þeir mættu í morgun, vel nestaðir og spennt fyrir deginum. Í 1. bekk er gengið í Sigfúsarlund og í 10. bekk í Stórurð þannig að göngurnar smá lengjast eftir því sem krakkarnir verða eldri og öflugri. Á næstu dögum munum við birta fleiri myndir úr göngunum.

Í vetur hefst innleiðing á „Uppeldi til ábyrðar“ (Restitution – Self Discipline) sem er hugmyndakerfi þar sem lögð er áhersla á sjálfsskoðun, uppbyggileg samskipti, kennslu sjálfsaga og sjálfstjórn í samskiptum. Ef samskipti í skólanum eru góð og gefandi má byggja á þeim árangursríkt nám. Í því sambandi er mikilvægt að átta sig á því að eina manneskjan sem við getum stjórnað erum við sjálf. Stefnan kennir að það sé í lagi að gera mistök en vi fáum tækifæri til að lagfæra þau og læra af þeim með betri samskiptum. Það er uppbygging sjálfsaga. Svokallaður þarfahringur er kynntur nemendum, svo þeir þekki grunnþarfir sínar og geti uppfyllt þær án þess að trufla aðra. Stefnan á upphaf sitt í Kanada hjá Diane Gossen sem hóf að þróa aðferðina en hún byggir hana á hugmyndum og rannsóknum annarra fræðimanna, m.a. á heilastarfsemi, áhrifum umbunarkerfa, sjálfstjórnarkenningum og fleiru. Allir umsjónarkennarar sjá um að vinna markvisst með og kynna „Uppeldi til ábyrgðar“ í sínum umsjónarhópum. Það eru þó ekki bara þeir sem vinna eftir stefnunni heldur allt starfsfólk skólans og ekki síst nemendur sjálfir. Við munum öll taka höndum saman um að innleiða og nota uppbyggingarstefnuna í starfi skólans. Á kynningarfundum stiga og árganga, sem fyrirhugaðir eru 19.- 21. september, verður kynning á Uppeldi til ábyrgðar fyrir foreldra og forráðamenn. Upplýsingar um innleiðinguna og hugmyndafræðina verða sendar út reglulega í vetur. Þeir sem vilja kynna sér Uppbyggingarstefnuna er bent á heimasíðuna www.uppbygging.is