Fréttir

Löng hefð er fyrir því að fullveldinu er fagnað í Egilsstaðaskóla þann 1.desember. Nemendur mættu í sal skólans og hlýddu á ávarp skólastjóra og formanns Nemendaráðs. Auk þess var upplestur en nemendur, sem báru sigur úr býtum í Stóru upplestrarkeppninni síðastliðinn vetur, lásu textabrot og ljóð. Kennarar og nemendur Tónlistarskólans á Egilsstöðum spiluðu undir söng en allir sungu saman í tilefni af Degi tónlistar. Það er alltaf hátíðlegt að koma saman og fagna þessum áfanga í sögu landsins enda eru nemendur og starfsfólk hvattir til að mæta í betri fötunum.

Árshátíð elsta stigs var haldin 17.nóvember sl. Nemendur settu upp söngleikinn Mamma Mia eftir Benny Andersson, Björn Ulveus og Caherine Johnson, í leikstjórn Hrefnu Hlínar Sigurðardóttur með aðstoð Berglindar Hönnudóttur, Hildar Vöku Bjarnadóttur og umsjónarkennara í 8.-10.bekk. Öll umgjörð sýningarinnar var undirbúin af nemendum, kennurum og starfsfólki skólans. Hljómsveit skipuð kennurum og nemendum Tónlistarskólans á Egilsstöðum lék undir í nokkrum lögum en flestir þekkja Abba-lögin sem sungin eru í sýningunni. Sýnt var fyrir fullu húsi og undirtektir áhorfenda voru mjög góðar. Enginn aðgangseyrir var á sýninguna en tekið við frjálsum framlögum. Það er ánægjulegt að fyrir upphæðina sem áhorfendur lögðu til var hægt að kaupa nokkra hljóðnema, sem er mjög mikilvægt að eiga hér í skólanum til að nota við ýmis tækifæri. Sýningin var tekin upp af Tókatækni og verður upptakan til sölu. Upplýsingar um það verða sendar síðar.

Í 9.bekk er fjallað um mannslíkamann í náttúrufræði. Eitt af verkefnunum er að kryfja líffæri til að nemendur sjái með eigin augum – og finni – hvernig líffæri eru. Notuð eru hjörtu, lifur o.fl. úr kindum sem keypt eru til þessara nota. Nemendur er misupprifnir yfir verkefninu en flestum finnst þetta fróðlegt. Meðfylgjandi mynd er frá krufningunni, birt með leyfi kennara og nemenda.

Í haust hafa nemendur á miðstigi tekið þátt í lestrarspretti, sem snúist hefur um að lesið er eins mikið og hægt er á ákveðnu tímabili. Afraksturinn birtist myndrænt á göngunum fyrir framan kennslustofurnar. Í einhverjum tilfellum endaði spretturinn með þvi að bekkurinn horfði á mynd og fékk popp – enda höfðu þau búið sér til popp-mynd úr lesnum bókum.

Skólabyrjun nálgast óðfluga og örugglega margir orðnir spenntir fyrir því að byrja í skólanum á ný. Nýtt skólaár handan við hornið og styttist í að skólinn iði af lífi. Síðustu daga hafa skólastjórnendur unnið að því að skipuleggja vetrarstarfið sem er farið að taka á sig mynd. Skólasetning Egilsstaðaskóla fer fram þriðjudaginn 23. ágúst. Gert er ráð fyrir stuttri samkomu í sal en síðan munu nemendur ásamt foreldrum hitta umsjónarkennara í sínum heimastofum. Kl. 10:00 Nemendur í 1.-3. bekk Kl. 10:45 Nemendur í 4.-6. bekk Kl. 11:30 Nemendur í 7.-10 bekk Nemendur og forráðamenn 1. bekkjar verða jafnframt boðaðir í viðtal með umsjónarkennara í skólabyrjun. Kennsla hefst samkvæmt stundaskrá, hjá öllum bekkjum, miðvikudaginn 24. ágúst klukkan 8:50. Frístund tekur til starfa þriðjudaginn 23. ágúst fyrir nemendur í 2.-4. bekk og miðvikudaginn 24. ágúst fyrir nemendur í 1. bekk. Umsjónarkennarar skólaársins 2022-2033 1. bekkur : Berglín Sjöfn Jónsdóttir, Jóhanna Björk Magnúsdóttir og Sigrún Þöll Hauksdóttir Kjerúlf 2. bekkur : Drífa Magnúsdóttir, Elva Rún Klausen og Freyja Kristjánsdóttir 3. bekkur : Auður Dögg Pálsdóttir, Halldóra Björk Ársælsdóttir og Védís Hrönn Gunnlaugsdóttir 4. bekkur : Ingibjörg Sóley Guðmundsdóttir og Lovísa Hreinsdóttir 5. bekkur : Erla Gunnlaugsdóttir og Hlín Stefánsdóttir 6. bekkur : Carola Björk Tschekorsky Orloff og Margrét Dögg Guðgeirsdóttir Hjarðar 7. bekkur : Fjóla Margrét Hrafnkelsdóttir og Valgeir Sveinn Eyþórsson 8. bekkur : Sandra Ösp Valdimarsdóttir og Sæbjörn Guðlaugsson 9. bekkur : Fjóla Rún Jónsdóttir og Jón Magnússon 10. bekkur : Helga Jóna Svansdóttir og Þórunn Guðgeirsdóttir

Lagarfljótsormurinn, skólablað Egilsstaðskóla er nú kominn út í 53. sinn. Blaðið er fullt af efni eftir nemendur og starfsmenn skólans. Útgáfa blaðsins er hluti af fjáröflun 9.bekkjar fyrir skólaferðalag sem farið verður vorið 2023. Nemendur munu ganga í hús á næstu dögum og selja Lagarfljótsorminn. Verð er kr. 1500. Jafnframt er hægt að kaupa blaðið á skrifstofu skólans.

Stúlkur og kynsegin ungmenni í 8. og 9. bekk taka þátt í námskeiðinu “Stelpur Filma” þessa vikuna, þ.e. frá 25.-29. apríl. Námskeiðið er haldið á vegum RIFF og hefur MMF/Sláturhús frumkvæði að námskeiðinu hér. Námskeiðið veitir þátttakendum einstaka sýn inn í heim kvikmyndagerðar og eru allir kennarar námskeiðsins starfandi kvikmyndagerðarkonur á Íslandi.

Fimmtudaginn 31. mars síðastliðinn var Litla upplestrarkeppnin haldin hátíðleg hjá nemendum í 4. bekk. Nemendur buðu foreldrum sínum að koma og hlusta og nemendum í 3. bekk skólans var jafnframt boðið. Hátíðin var virkilega vel heppnuð, nemendur komu fram og lásu kvæði, málshætti og andheiti bæði allir saman sem hópur en einnig í smærri hópum. Þá voru nemendur úr bekknum sem einnig eru í tónlistarnámi við tónlistarskólann með atriði en þau sungu, spiluðu á ukulele og píanó. Nemendur úr 7. bekk sem báru sigur úr bítum í stóru upplestrarkeppninni voru auk þess gestir á hátíðinni. Að lokinni vel heppnaðri dagskrá á sviðu buðu nemendur foreldrum sínum í heimsókn inn í stofur að skoða afrakstur verkefna sem þau hafa unnið um Norðurlöndin og landnám Íslands síðustu vikur.

Þann 30. mars síðastliðinn var útivistardagur hjá nemendum í 5.-7. bekk. Nemendum stóð til boða tveir kostir sem þeir þurftu að velja fyrirfram. Annað var gönguferð í Finnsstaði í Eiðaþinghá með Þórdísi Kristvinsdóttur, leiðsögumanni og Hildi Bergsdóttur, útivistarþjálfara. Hitt var skíða-, bretta- og/eða sleðaferð í Stafdal. Hópur 40 nemenda gekk sem leið lá eftir stíg meðfram Eyvindaránni í Finnsstaði. Á Finnstöðum var hægt að klappa hestum, kanínum og naggrísum og þeim gefið salat og gulrætur auk þess sem farið var í ævintýraratleik. Í skógarrjóðrinu á staðnum var tálgað, poppað og grillað góðgæti. Góður dagur í ævintýralandinu á Finnsstöðum. Á sama tíma fóru rúmlega 70 nemendur í rútu í Stafdal. Sumir alvanir brekkunum á meðan aðrir stigu í fyrsta skipti á skíði eða snjóbretti. Skíðakennari var á staðnum til að leiðbeina nýliðum. Það var gaman að sjá hvað nemendur voru tilbúnir að láta vaða og standa alltaf upp aftur eftir ítrekuð föll. Seiglan! Veðrið var eins og best verður á kosið á þessum árstíma. Dúnalogn og nokkrir sólargeislar náðu í gegnum skýin á tímabili. Heilt yfir frábær dagur hjá okkar fólki. Ánægjan skein úr andlitum nemenda og greinilega kærkomið að fara aðeins út úr skólanum og stunda nám af öðrum toga en gengur og gerist hversdags.