20.09.2024
Um síðustu áramót varð Egilsstaðaskóli símalaus skóli. Þar með var nemendum ekki heimilt að vera með farsíma í skólanum, hvorki í kennslustundum eða frímínútum. Fyrsta misserið var látið reyna á að krakkarnir geymdu símana í töskum eða yfirhöfnum ef þau komu með símana í skólann. Þetta hefur svo reynst ýmsum erfitt og starfsfólk verður vart við að það fjölgar þeim nemendum sem eru með símana á lofti, sérstaklega í frímínútum.
Þeir nemendur, í 7. - 10. bekk, sem velja að koma með síma í skólann þurfa frá og með mánudeginum 23. september að skila símanum í símabox í upphafi skóladags. Símarnir eru svo afhentir í lok skóladags. Símakassarnir verða geymdir í lokuðum skáp á starfsmannagangi. Ef nemendur þurfa að hringja þá er alltaf hægt að óska eftir að hringja hjá ritara eða fá leyfi hjá kennara til að hringja úr kennslustofum.
Stöðugt fleiri rannsóknir sýna skaðleg áhrif mikillar farsímanotkunar, þá sérstaklega notkun samfélagsmiðla, á líðan barna og ungmenna og sömuleiðis á lestrarfærni. Það skiptir því miklu máli að samstaða sé milli heimila og skóla um að draga úr þeim tíma sem börn nota síma og samfélagsmiðla.
Eins og áður er nemendum í 1. - 6. bekk ekki heimilt að koma með síma í skólann.
Meðfylgjandi eru myndir af símakössunum og þeim skilaboðum sem nemendur fá um símalausan skóla.
Lesa meira
19.09.2024
Það sem af er hausti nemendur 4. bekkjar verið að vinna að samþættu verkefni í íslensku og náttúru- og samfélagsfræði eftir aðferðafræði byrjendalæsis. Þeir hafa nýtt sér góða haustdaga til að bregða sér út fyrir veggi skólans og nýtt sér náttúruna í næsta nágrenni hans til náms og leikja. Í blíðunni í gær lá leiðin upp í Selskóg þar sem m.a. var gengið í þögn og skynfærin nýtt til hins ítrasta til að upplifa umhverfið, birkifræjum safnað, farið í náttúrubingó og leitað að litum haustsins. Krakkarnir nutu sín ágætlega á þessum fallega haustdegi.
Lesa meira
17.09.2024
Í dag er Þorgrímur Þráinsson rithöfundur í heimsókn hjá okkur í Egilsstaðaskóla. Hann byrjaði daginn á því að hitta nemendur í 5. - 7. bekk og ræða við þau um lestur. Hann kallar það erindi Tendrum ljós fyrir lestri. Síðar í dag hittir hann nemendur í 10. bekk og ræðir við þau um að bera ábyrgð á sjálfum sér, sýna samkennd og þrautseigju, koma fallega fram, gera góðverk, sinna litlu hlutunum daglega og setja sér markmið.
Þorgrímur hefur farið um landið og spjallað við krakka í mörg ár og það alltaf tilhlökkunarefni að fá hann í heimsókn.
Lesa meira
06.09.2024
Árlegur göngudagur Egilsstaðaskóla heppnaðist með ágætum. Starfsfólk og nemendur héldu af stað í ljómandi veðri á áfangastaði vítt og breitt á Fljótsdalshéraði. Ferðalangarnir tíndu í sig ber og syntu þar sem því varð við komið. Allir komu heilir heim en sumir skítugri en aðrir. Meðfylgjandi eru svipmyndir frá ferðum nokkurra árganga.
Lesa meira
03.09.2024
Nemendur Egilsstaðaskóla og starfsfólk er nú farið af stað í árlega gönguferð. Gönguleiðirnar eru á Héraði, styttri fyrir yngri börnin og lengri eftir því sem þau eldast. Þær leiðir sem eru farnar eru:
1.bekkur – Sigfúsarlundur; gengið frá skóla
2. bekkur – Klofasteinn; gengið frá skóla
3. bekkur – Egilsstaðavík; gengið frá skóla
4. bekkur – Hrafnafell
5. bekkur – Rauðshaugur
6. bekkur – Fardagafoss
7. bekkur – Valtýshellir
8. bekkur – Bargselsbotnar
9. bekkur – Stapavík
10. bekkur – Stórurð
Nemendur í 1. - 4. bekk koma í hádegismat og þá tekur við venjulegur skóladagur til 13.50. Nemendur í 1. - 5. bekk fara heim þegar þeir koma tilbaka. Göngudagurinn er áralöng hefð í skólanum og tækifæri til að njóta náttúrunnar í nærumhverfinu og þjappa árgöngum saman.
Lesa meira
29.08.2024
Fimmtudaginn 5. september hefst fyrsta valtímabil. Nemendur hafa fengið kynningu á valnámskeiðum og fyrirkomulagi valsins. Þeir fara heim með valblaðið í dag og eiga að skila valblaðinu aftur á morgun með undirskrift foreldra / forsjáraðila. Foreldrar og forsjáraðilar fengu póst í dag með upplýsingum um valið; valblaðið í viðhengi ef einhver gleymir því í skólanum. Auk þess voru þar upplýsingar um reglur um utanskólaval.
Valbæklingur er aðgengilegur á heimasíðu skólans, undir Nám og kennsla - Val í 8. - 10. bekk.
Lesa meira
22.08.2024
Í dag var Egilsstaðaskóli settur í 77. sinn. Viðar Jónsson, sem nýverið tók við stöðu skólastjóra, ávarpaði nemendur og forráðamenn þeirra. Hann greindi frá því að í haust hefja um 430 nemendur nám í skólanum og starfsfólk er um 100. Unnið er að þremur þróunarverkefnum í skólanum; leiðsagnarnámi, Uppeldi til ábyrgðar og frá þessu hausti hefst innleiðing verkefnisins Heillaspora en það verður nánar kynnt fyrir forráðamönnum á næstu vikum.
Skólastarfið hefst svo að fullu á morgun, föstudag. Nú er boðið upp á gjaldfrjálsar skólamáltíðir en forráðamenn eru beðnir um að skrá börn sín í ávaxtaáskrift.
Lesa meira
14.08.2024
Egilsstaðaskóli verður settur þ. 22. ágúst nk. Nemendur í 1. - 4. bekk mæta klukkan 10.00 í matsal og eftir stutta samverustund fara þeir í heimastofur. Nemendur í 5. - 10. bekk mæta kl. 11.00 í matsal og fara einnig í heimastofur að lokinni stuttri samverustund. Foreldrar og forsjáraðilar eru velkomnir með börnunum. Skóladegi lýkur eftir að nemendur hafa hitt umsjónarkennara í heimastofum en skólastarf hefst svo að fullu föstudaginn 23. ágúst.
Skrifstofa skólans er nú opin frá kl. 8.00 til 16.00 alla virka daga.
Lesa meira
13.06.2024
Undirbúningur fyrir næsta skólaár er í fullum gangi í Egilsstaðaskóla. Nú liggur fyrir hvernig umsjónarkennarateymi verða skipuð. Þar eru bæði kennarar sem hafa starfað lengi við skólann og aðrir sem eru að hefja störf við skólann.
Upplýsingar um aðra kennara verða gefnar í ágúst, s.s. íþróttakennarar, list- og verkgreinakennarar, faggreinateymi á unglingastigi og hverjir sinna stoðþjónustu í skólanum.
Í 1. bekk verða umsjónarkennarar Berglind Karlsdóttir, Drífa Magnúsdóttir og Sigrún Þöll Kjerúlf
Í 2. bekk verða umsjónarkennarar Halldóra Björk Ársælsdóttir og Svana Magnúsdóttir
Í 3. bekk verða umsjónarkennarar Berglín Sjöfn Jónsdóttir, Fanndís Ósk Björnsdóttir og Jóhanna Björk Magnúsdóttir
Í 4. bekk verða umsjónarkennarar Gyða Guttormsdóttir, Jónína Brá Árnadóttir og Júlía Kristey H. Jónsdóttir
Í 5. bekk verða umsjónarkennarar Carola Björk T. Orloff, Rósey Kristjánsdóttir og Védís Hrönn Gunnlaugsdóttir
Í 6. bekk verða umsjónarkennarar Auður Dögg Pálsdóttir, Erla Gunnlaugsdóttir og Lovísa Hreinsdóttir
Í 7. bekk verða umsjónarkennarar Adam Eiður Ásgeirsson, Hlín Stefánsdóttir og María Emilsdóttir
Í 8. bekk verða umsjónarkennarar Sigurður Högni Sigurðsson og Þórunn Guðgeirsdóttir
Í 9. bekk verða umsjónarkennarar Fjóla Rún Jónsdóttir, Fjóla Margrét Hrafnkelsdóttir og Sigfús Guttormsson
Í 10. bekk verða umsjónarkennarar Jón Magnússon, Sandra Ösp Valdimarsdóttir og Sæbjörn Guðlaugsson
Lesa meira
07.06.2024
Egilsstaðaskóla var slitið í 76. sinn fimmtudaginn 6. júní sl. Þá fengu 413 nemendur vitnisburð sinn en af þeim útskrifuðust 34 úr 10. bekk. Kristín Guðlaug Magnúsdóttir flutti skólaslitaræðu þar sem hún greindi m.a. frá því að hún lætur af starfi skólastjóra í vor en heldur áfram störfum innan skólans sem umsjónarmaður bókasafnsins. Við útskrift 10. bekkjar flutti formaður Nemendaráðs, Ríkey Anna Ingvarsdóttir, ávarp og umsjónarkennarar 10. bekkjar töluðu til nemenda. Fulltrúar nemenda afhentu umsjónarkennurum, iðjuþjálfa og stuðningsfulltrúum gjafir með þökkum fyrir samstarfið.
Nemendur fluttu tónlistaratriði á skólaslitunum. Maria Anna Szczelina spilaði verk eftir Debussy á píanó og hljómsveit skipuð 9 nemendum í 10. bekk spilaði lagið Hotel California ásamt Margréti Láru Þórarinsdóttur.
Við óskum öllum útskriftarnemum til hamingju með þennan stóra áfanga og hlökkum til að fylgjast með þeim í framtíðinni.
Lesa meira
