Fréttir

Nemendur í 4. bekk hafa undanfarið fjallað um lýðræðislegar kosningar og hvernig hægt er að hafa áhrif á umhverfi sitt. Í kjölfar þess kusu krakkarnir um hugmyndir sem þau höfðu sett fram og skrifuðu svo bréf til sveitarstjóra þar sem hugmyndunum var komið á framfæri. Til að fylgja erindinu eftir fór hópurinn upp á bæjarskrifstofur og heimsótti Dagmar Ýr sveitarstjóra. Meðfylgjandi er bréfið sem þau skrifuðu og myndir af krökkunum. Kæra Dagmar, sveitarstjóri Múlaþings Við í 4. bekk í Egilsstaðaskóla höfum nýlega rætt um lýðræðislegar kosningar og hvernig við getum haft áhrif á nærumhverfi okkar. Í lífsleiknitíma í skólanum kusum við átta hugmyndir sem við teljum að myndu bæta umhverfið okkar mikið. Við viljum því koma þessum hugmyndum á framfæri við ykkur og vonum að þær fái athygli. Hér eru hugmyndirnar sem við völdum: 1. Moka gangstéttir betur og oftar. Það er ekki gott að þurfa að labba á götunni þegar það er mikill snjór eða ruðningar. Svo eru sumir sem hjóla, eru með barnavagn eða í hjólastól sem komast ekki leiðar sinnar þegar það er mokað illa. 2. Fleiri vatnskranar við íþrótta- eða leikvelli. 3. Hreinsa tjörnina í Tjarnargarðinum. 4. Betri körfuboltavöll í Fellabæ. 5. Fleiri leikvelli og leiktæki fyrir okkar aldurshóp. 6. Vísindi sem námsgrein í Egilsstaðaskóla. 7. Stærra skautasvell og fleiri hjálpargrindur við skautasvellið. 8. Afmarkaður staður á Egilsstöðum þar sem ríkir friður, ró og hæglæti. Það væri hægt að setja upp skilti og hvetja fólk til hæglætis og rólegheita, að það væri bannað að vera með læti á þessu svæði. Við teljum að þessar breytingar myndu hafa jákvæð áhrif á samfélagið okkar og bæta lífsgæði bæði barna og fullorðinna. Við vonum að sveitarfélagið geti skoðað þessar hugmyndir og kannski tekið fyrstu skrefin í að framkvæma þær. Við erum spennt fyrir því að sjá hvernig bæjarfélagið okkar getur orðið enn betra fyrir alla, og við erum tilbúin að styðja við verkefni sem tengjast þessum hugmyndum ef það þarf. Við þökkum ykkur fyrir að taka okkur alvarlega og hlökkum til að heyra frá ykkur. Með kærri kveðju, Nemendur í 4. bekk, Egilsstaðaskóla

Veðrið lék við nemendur og starfsfólk í 5. - 10. bekk á útivistardegi í dag. Val var á milli þess að ganga yfir í Vök og baða sig þar í laugunum eða fara á skíði í Stafdal. Stór hópur nemenda eða um 120 völdu að fara í Vök og um 70 fóru á skíði í Stafdal. Dagurinn gekk vel og börn og fullorðnir nutu útiverunnar til hins ítrasta. Meðfylgjandi eru myndir sem starfsfólk skólans tók í Vök og í Stafdal en þær sýna vel stemninguna sem ríkti.

Nemendur í 1. og 2. bekk héldu fjórðu og síðustu árshátíð skólaársins. Rúmlega 80 börn brugðu sér í gervi persónanna sem við þekkjum úr sögunum um Línu Langsokk. Þarna stigu á svið Tommi og Anna, Langsokkur kapteinn og skipsfélagar hans, þjófar og lögreglumenn og nemendur í skólanum, að ógleymdri frú Prússulín og vinkonum hennar. Lína sjálf lék við hvern sinn fingur, dansaði og söng. Þessir yngstu nemendur skólans sýndu mikinn dugnað og þor með því að koma fram fyrir fullan sal af aðstandendum og margir voru greinilega fegnir að geta hlaupið í fangið á sínu fólki að sýningunni lokinni. Að venju aðstoðu tónlistarkennarar úr Tónlistarskólanum á Egilsstöðum við uppsetninguna auk þess sem nemendur úr 4. og 7. bekk stjórnuðu hljóði og ljósum. Árshátíðarvertíðinni er lokið í bili en hefst svo aftur í haust með árshátíð elstu nemenda.

Það eru fjölbreytt viðfangsefni í skólanum að venju. Í dag hófst fyrirlögn á Matsferli en Egilsstaðaskóli er einn 26 skóla sem taka þátt í þróun á stafrænum stöðu- og framvinduprófum í lesskilningi og stærðfræði. Matsferill verður svo tilbúinn á næsta ári og þá lagður fyrir nemendur í 4. - 10. bekk í öllum skólum. Krakkarnir í 9. bekk nýttu sér gangana til að ræða um stærðfræði og reikna saman. Með þessu móti er stærðfræðin sýnileg í skólaumhverfinu og verður þannig til þess að krakkarnir ræða um hana sín á milli.

Á hverju skólaári tekur 7. bekkur þátt í verkefni sem gengur undir nafninu Stóra upplestrarkeppnin. Verkefnið nær allt aftur til 1996 þegar þróunarverkefni um upplestur og framsögn hófst í Hafnarfirði. Þó í heiti verkefnisins sé orðið keppni þá er alls ekki um eiginlega keppni að ræða heldur þróunarverkefni sem snýst um að æfa nemendur í upplestri og auka áhuga á íslensku. Stóra upplestrarkeppnin fer fram í þremur hlutum. Í upphafi æfa allir nemendur í 7.bekk sig í upplestri og framsögn og á bekkjarhátíð eru valdir 15 lesarar sem fara áfram í næsta hluta. Á skólahátíð eru fengnir utanaðkomandi dómarar til að velja 5 nemendur sem eru fulltrúar skólans á Héraðshátíð. Héraðshátíðin fór fram í Egilsstaðakirkju 25. mars sl. Fulltrúar Egilsstaðaskóla stóðu sig framúrskarandi: Bjarni Jóhann Björgvinsson var valinn besti lesarinn og Styrmir Vigfús Guðmundsson varð í þriðja sæti. Það er alltaf ánægjulegt að fylgjast með hvað krakkarnir eflast og styrkjast í æfingaferlinu og þetta er þjálfun og reynsla sem nýtist þeim síðar í lífinu við margvíslegar aðstæður.

... eftir að allir nemendur og starfsfólk er farið heim. Þá fara mjúkdýrin á stjá og njóta rólegheitanna með því að lesa og lita.

Um 100 börn sviðsettu söguna um Línu langsokk á árshátíð 3. og 4. bekkjar í síðustu viku. Það var mikið fjör og krakkarnir stóðu sig með mikilli prýði. Að venju þarf að sinna ýmsum verkefnum, ekki aðeins að leika og syngja heldur líka hanna og gera sviðsmynd, stjórna ljósum og hljóði, setja saman búninga og öll þau verkefni sem fylgja því að setja upp leiksýningu. Myndirnar segja meira en mörg orð. Sumir myndirnar eru teknar af Unnari Erlingssyni og við þökkum honum kærlega fyrir að fá að birta þær hér.

Krakkarnir í 5. bekk buðu forráðafólki sínu á sýningu á áhugasviðsverkefnum sem þau hafa unnið að undanfarið. Verkefnin voru mjög fjölbreytt og gaman að sjá hvað krakkarnir höfðu lagt mikinn metnað í þau. Sem dæmi um verkefni má nefna Grænland, nefapa, ísbirni, sveitina, fræga íþróttamenn, íþróttafélagið Hött og margt fleira. Meðfylgjandi eru myndir af hluta verkefnanna og krökkunum.